قصائــد الشاعـر خالـد المـريـخـي

بسم الله الرحمن الرحيـمـ

السلام عليكم ورحمة الله وبركاته

أقدم لـكم قصائـد للشاعر الكبير .. خـالـد المريـخـي ..

طبعا خالد من الشعراء المعروفين على الساحة الشعـريـة

دائـمـا يمتعـنا بقصـائـدهـ الجميـلة والرائـعـه...

يا كثر طيبه
حبيبي يا كثر طيبه
يخجّلني بترحيبه
ولا ادري كيف اهلّي به
عساني ما انحرم منّه

عتابه ما يضايقني
احس انه يشوّقني
يالينه ما يفارقني
وعساني ما انحرم منّه

بكل رقّه يعاملني
ولا يرضا يزعلني
اذا اخطا قمت جاملته
واذا زلّيت جاملني

وجود الحب يكفينا
وهذي كل امانينا
انا ويّاه فينا طبع
إذا حبينا .. حبينا

تكفون خلوه

تكفون خلّوه لا تحصون غلطاته ... انا ادري انه تلف حــــالي وضيعني

وادري سواة العدو ابرك من سواته ... بس ان قلبي واعرفه ما يطاوعني

هذاك انا اضيع لا طالت نظراته ... بعيونه الســـــود يسمح لي ويمنعني

أحلى عــــلامات فالدنيا علاماته ... متّع نظر كـــــل من شافـــــه ومتّعني

خلـّوه يخطي انا راضي بســــيّاته ... يخطي بكيـــفه ولكــــن لا يقاطعني

من كثر ما اغليه صرت افرح بزلاته ... ولو قلتوا اخطا عليك اقول وش يعني ؟!

خلاني أمشي على كيفه ومشهاته ... طوّعني شلون ؟! مدري بس طوّعني

ثلاث أيام

هاك كل القصايد هاك واقريهن ... لا تقولين ش اخرهن وش اولهن

كلهن فــدوةٍ لك هالك قوليهن ... في لسانك ترى لسانك يجملهن

غيبتك أثــرت في حــال راعين ... قطعة أيـــام عيّا لا يتحملـهن

بس يمكـن ثلاث ايام غبتيهن ... لعنبوها لثلاث ايــام ما اطــولهن

طالعي في فعايلهن وشوفيهن ... تحـــت عيني تبين لك فعايلهن

ما هقيت اني اسلم مــــن بلاويهن ... بهذلنّي جعل ربي يبهذلهن

وتهت حتى القصايد قمت اعنيهن ... يكملن وانسى واعوّد واكمّلهن

والمعاني غريبه !! .. قمت برجليهن ... باتشرّط عليهن وآخذ اجملهن

اتركي هالثلاث ارجــوك خليهن ... سولفي باي حاجه بنتجاهلهن

انــسي ايامهن وانسي لــــياليهن ... همّليهن وانا مثلك باهمّلـــهن

لا تجيبين ســـيرتهن وطاريهن ... انزعــــج حيل لاقمت آتخيلهن

المعاند

قلت : خل المعاند ما سمعت الكلام ... ذوق نار المعـــــاند ذوقها يا عنيد

قلت لك : ف المحبه صار لي كم عام ... وانت توّك على دنيا المحبه جديد

ما انت قد المخاصم ليه تبدا الخصام ... ما دريت ان قدرك لا نقص ما يزيد

ضعت مدري وش اللي ضيعك يا حرام ... بس انا اموت واعرف انت وش مستفيد

تحسب اني ابـــرضى بالعتب والملام ... لا حبيبي انا وقت الشـــدايد شـــديد

لا تكثّر كلامـــــك ما يفيد الكــــلام ... روح مابي كــلامك .. روح فرقاك عيد

أشكي له

جتني قصيده كنها رسم رسام ... أصيلة وآنا هـــــواي الأصــــــيله

ومن يوم جتني هاجس الشعر حوّام ... ومن طيب راعيها نويت احتسي له

لوّ الــــمراجل نعتبرها بالارقام ... أنا اشهد انه بياخذ اكبر حصيله

غلام سعد اللي لهم مثله غلام ... أشفى غليل ابـــــوه واشفى غليله

وعنده قلم مهو مثل كــل الاقلام ... محرّم مـــــا يكتب الا الجميله

هو يشتكي لي كل ما صار منضام ... وانا على طول ان زعلت اشتكي له

بقول له دامه على الوقت لوّام ... الوقت بيـــــدنا ولابـــاد حيله

ياخوي لا تتعب بتحسيب الاعوام ... مافات خلّه واتركه لا تخيله

شفني أنام أحيان واحيان ما نام ... أفرح دقايق وانطوي كل ليله

كني شعب بغداد والوقت صدام ... ما هو بكيفي غصب قمت انحني له

حملي تقسّم وانقسم عشرة اقسام ... حاولت اشيله لكن ازريت اشيله

وش غرضهن ؟؟ يا طبيب القلوب ان كان تعرف مرضهن ... هن يداون جروح الوقت او ما يداون

الغريبه جروحي مــــا يدانن بعضهن ... بس من طــول مدّتهن بقلبي تـــخاون

كل ما اونستهن قمت اشتكي وآعرضهن ... مير ذا الوقت ف الشدات محدٍ يعاون

شف تردّن عزومي مير محدٍ نهضهن ... كل من رحت يمه قال : ما ينتداون

حسبي الله على اللي وسط قلبي فرضهن ... لين خلا الليالي في عيوني تساون

يا طبيب القلوب ارجوك شف وش غرضهن ... قوم انا انت تكفا يا طبيب نتعاون

اكثر الناس قالوا كلمتين آحفظهن ... ما يطيب المرض دام المريض يتهاون

جيت أشتكي لك جيت أشتكي لك من عنا الوقت ابرتاح ... لقيت نفسي أشتكي من همومك

يا عـــونة الله ما بقى شي ما راح ... مدري ألوم الــوقت والا ألـــومك

جيتك وقلت بعالي الصوت : يا صاح ... بالله ساعدني ترى اليوم يومك

لا النفس مرتاحه ولا القلب مرتاح ... وحسيت نفسي واحد من خصومك

اثريك صاحب بس في وقت الافراح ... وبكل سهوله ترخص اللي يسومك

الله يعين القلب وشلون يرتاح ... زود على همومه تحمل همومك

بيني وبينه

يا بو فهد لا صرت تنشد عن الحال ... حالي بها ياخوك عشرين علّه

لي صاحبٍ يسوى ثلاثين رجال ... كـــلٍ شهـــد وآنا بعد شـــاهدٍ له

طيّب ، وفي ، كريم في كل الاحوال ... ومن عاشره اقسم قسم ما يملّه

كنت آتعذر له إذا زل أو عـــال ... بــيني وبـينـــه مـــا تجي أي زلّه

مـــا كنت اظنه يسمع القيل والقال ... إلين مــــا قفّى وانا مقبـــلٍ لّه

كشّر بوجهي واحسبه ضايق البال ... واقول في نفسي : مهي عادةٍ لّه

اثره سمع يا بو فهد هرج الانذال ... حطوني ابغضته وانا منصحٍ لّه

واليوم ابيك تحلّها وانـــت حلاّل ... يا سيفي اللي لا تضايقت اسلّه

يا طيب فعلك يوم اطالع بالافعال ... انا اشــــهد ان اللي يغلّك تغلّه

يا بو فهد كنّ المراجل لك عيال ... والطيب كنّه عود وانت ولدٍ لّه

يحلالي

يحلالي الشعر لا شفته ويحلاله ... واللي يعجبه يرضى فيه يعجبني

أنا انطرب لا قصدت بردة افعاله ... لا قلت شعري وقال : الله يطربني

ما هـــو مع الناس هو هناك بلحاله ... ياقصى خفوقي يريحني ويتعبني

الله عطاني غلاه ونعمة اوصــاله ... وحبّبه فيني مثــل ما فـــيه حبّبني

ما يجوز له شي مــدري كيف جزناله ... انا اشهد اني مشنّص يوم قربني

ولو قالوا الناس : خله مالك وماله ... باقول : يجذب ولا ادري كيف يجذبني

ادري مهـــو زين مـــاشيٍ حاله ... زينه مهــــو كل هذا .. بس عاجبني

يا حلو لثغتها

نور عيني تبعثرني متى ما لفت ... وكل الاوراق تتلخبط بشوفتها

لا حضر نورها نور الليالي خفت ... ذيك حتى المسا يحسب لطلتها

المشاعر ليا من صادفتها دفت ... والاحاسيس تتباشر بجيّتها

أنجذب حيل صوب عيونها لا غفت ... تجذب الكون كله جاذبيتها

إن صفا جوها دنياي معها صفت ... ما يروّق مزاجي غير ضحكتها

البراءه ليا منا كبرنا اختفت ... بس اهي عكسنا زادت براءتها

إن حكت من خجلها دنّقت وارجفت ... هذا هالحين وشلون بطفولتها ؟!

كن بلسمها لثغه ليا سولفت ... بس يا حلوها ويا حلو لثغتها

تسوى عيوني

أجيك يسلك راسك شلونما جيك ؟! ... ويّاك انا بالذات صعب آتغلّى

والله ما ادري من الغلا وين اوديك ... تسوى عيوني او بعد يمكن اغلا

بس انت تال الوقت ربي يجازيك ... عـرفت مقدارك وقمت تغلّى

قلنا تغلّى ميــر زدت بتغليك ... والنـــاس قــالوا مـن تغلى تخّلا

زودتها حبتين

لا لا تكثر حلوفك
بديت املّك واعوفك
تمون .. لكن أشوفك
زوّدتها حبتين

ان كان تبغي الحقيقه
هالوضع ما عاد اطيقه
كلٍ يروح بطريقه
والله يستر عليك

ياللي تغيّر ودادك
ابعد وطوّل بعادك
دامك بديت بعنادك
تحمّل اللي يجيك

مادام الحب حي

يا اللي نويتو تبعدون
لو كذب .. قولوا لي تجون
حتى ولو ما ترجعون
الله يسمّح دربكم

محتاج امل لو هو شوي
باسلّي نفسي بأي شيّ
واحيا مدام الحب حيّ
الله يسمّح دربكم

أطيب المــنــى

محـدثـكم

ملـك العشق..

محتاج امل لو هو شوي
باسلّي نفسي بأي شيّ
واحيا مدام الحب حيّ
الله يسمّح دربكم

\\

بصراحه هذا أحلى بيت أو أحلى قصيدة ..

يعطيك العافية ..

الشاعر خالد المريخي شاعــر كبيــر ومعرووف وقصائدهـ جميله جداً

\\

|| ملك العشق ||

أشكرك ع المجهوود الجبار

يااحبي للمريخي بس

إذا كان الكلآم من فضه

فهذي القصائد من ذهب

تسلم لنا اناملك دلبووو

ع القصاائد الجميله

يعافيك ربي